(https://iegps.csic.es/wp-content/uploads/2023/01/PILULA02_GAL_def.mp4)
O Instituto de Estudos Galegos Padre Sarmiento (IEGPS), centro mixto do Consejo Superior de Investigaciones Científicas (CSIC) e da Xunta de Galicia, únese á efeméride do centenario do Seminario de Estudos Galegos (SEG), institución científica e cultural creada en 1923 e ligada á Universidade de Santiago de Compostela cuxo obxectivo principal era estudar e divulgar o patrimonio cultural galego.
Neste sentido, continúa a iniciativa promovida polo IEGPS, co apoio da Unidade de Cultura Científica (UCC) da Delegación do CSIC en Galicia: as “Pílulas CSIC do Seminario de Estudos Galegos”. Trátase dun total de 12 pezas audiovisuais cuxo labor é dar a coñecer o patrimonio do Seminario que se atopa custodiado no IEGPS.
A segunda destas pezas, titulada “As mulleres do Seminario”, xira ao redor das mulleres que participaron dunha maneira activa no Seminario, entre outras Dolores Lorenzo, Elvira Santiso, Sara Leirós, ou María Corredoira, pintora e membro da Real Academia Galega de Belas Artes que ingresou no Seminario entregando un lenzo que titulou “Cabeza”. Xunto a elas tamén destaca Pura Lorenzana, licenciada en Filosofía e Letras e en Dereito que se incorporou ao Seminario cun traballo sobre as mámoas de Saviñao; ou Luisa Cuesta, profesora universitaria e bibliotecaria da Universidade de Santiago de Compostela que chegou a dirixir a Biblioteca Nacional.
Esta segunda entrega inclúe imaxes dos textos, cadros e fotografías destas mulleres que, aínda que escasas no seu número, formaron parte activa do Seminario e contribuíron, coa súa gran valía e peso intelectual, a enriquecer a actividade científica e cultural do Seminario de Estudos Galegos.
(ver video)
