(https://iegps.csic.es/wp-content/uploads/2023/02/pildoraES-1.mp4)
O Instituto de Estudos Galegos Padre Sarmiento (IEGPS), centro mixto do Consello Superior de Investigacións Científicas (CSIC) e da Xunta de Galicia, únese á efeméride do centenario do Seminario de Estudos Galegos (SEG), institución científica e cultural creada en 1923 e ligada á Universidade de Santiago de Compostela cuxo obxectivo principal era estudar e divulgar o patrimonio cultural galego.
Neste sentido, hoxe ponse en marcha a iniciativa promovida polo IEGPS, co apoio da Unidade de Cultura Científica (UCC) da Delegación do CSIC en Galicia: as “Pílulas CSIC do Seminario de Estudos Galegos”. Trátase dun total de 12 pezas audiovisuais cuxo labor é dar a coñecer o patrimonio do Seminario que se atopa custodiado no IEGPS.
A primeira pílula, “O reloxo do Seminario”, xira ao redor dunha peza de gran valor histórico, un reloxo do século XVIII doado por don Joaquín Arias Sanjurjo, intelectual, político e mecenas galego, membro destacado do SEG, que participou en gran número de iniciativas culturais da época. Esta primeira entrega, que inclúe imaxes da complexa mecánica do reloxo, a súa melodía e autómatas, contextualiza e valoriza esta peza singular.
(ver video)
