O martes, 29 de marzo, ás 11:00 horas, levarase a cabo a terceira sesión dos «Seminarios bibliográficos del IEGPS 2022» co webinario «A unha voz na metade do reino: cincocentos anos da Xunta de Melide». No acto participarán o Dr. Antón M. Pazos e o Dr. Carlos Andrés González Paz, do Instituto de Estudios Gallegos Padre Sarmiento (CSIC, Santiago de Compostela) e o editor do libro de referencia, o Dr. Pegerto Saavedra Fernández, da Universidade de Santiago de Compostela, actuando como comentaristas o Dr. Manuel Reyes García Hurtado, da Universidade da Coruña, e a Dra. Inês Amorim, do CITCEM e a Universidade do Porto.
O 4 de decembro de 2020 cumpríronse cincocentos anos da "Xunta de Melide", unha reunión de magnates e potentados, leigos e eclesiásticos, convocada e celebrada na vila de Melide. Nesta obra conmemorativa, editada a iniciativa do Parlamento de Galicia e o Consello da Cultura Galega, non soamente se analizan a chamada, o desenvolvemento, os mesenterios e os acordos tomados nesta asemblea de señores de vasalos, senón a conxuntura xeral do antigo reino de Galicia entre o remate do reinado dos Reis Católicos e a monarquía universal hispánica de Carlos V, prestándose atención a contidos como o levantamento das Comunidades de Castela, a petición da recuperación do voto en Cortes e da creación dunha “Casa de Contratación” en Coruña, etcétera.
Poderase seguir en liña, na plataforma ZOOM, a través do seguinte enlace: https://us02web.zoom.us/j/84514066970?pwd=cVZGdDhPOTB5WXF6SlgrbmQvcnJMUT09.
