(https://iegps.csic.es/wp-content/uploads/2023/03/III-pildora-GAL-rev.mp4)
O Instituto de Estudos Galegos Padre Sarmiento (IEGPS), centro mixto do Consejo Superior de Investigaciones Científicas (CSIC) e da Xunta de Galicia, únese á efeméride do centenario do Seminario de Estudos Galegos (SEG), institución científica e cultural creada en 1923 e ligada á Universidade de Santiago de Compostela cuxo obxectivo principal era estudar e divulgar o patrimonio cultural galego.
Neste sentido, continúa a iniciativa promovida polo IEGPS, co apoio da Unidade de Cultura Científica (UCC) da Delegación do CSIC en Galicia: as “Pílulas CSIC do Seminario de Estudos Galegos”. Trátase dun total de 12 pezas audiovisuais cuxo labor é dar a coñecer o patrimonio do Seminario que se atopa custodiado no IEGPS.
A terceira destas pezas, titulada “As pioneiras do Seminario”, xira ao redor daquelas mulleres que, ademais das 12 socias activas, participaron nas actividades do Seminario. Como investigadoras destaca Luisa Cuesta, autora de ““La emigración gallega a America “, artigo publicado en 1932 en Arquivos, a revista do Seminario; xunto a ela Margot Sponer, cos seus estudos pioneiros sobre patrimonio documental da Galicia Medieval. Tamén se pon de relevo o xeneroso mecenado de Ángela Santamaría Alduncín, coñecida como Angelita Varela; ou o de Matilde Pondal Arioz e M.ª Carmen Abal Mieytes, polas súas achegas, xunto a outros moitos doantes, para sufragar en 1934 a publicación do Codex Calixtinus e do Corpus Petrogliphorum Gallaecie. Aínda que o número de mulleres que participaron dalgunha maneira na vida do Seminario é reducido, non por iso deixa de ser necesario reivindicar o seu compromiso e colaboración.
