O vindeiro venres, 22 de novembro de 2024, ás 19:00 h, presentarase no Museo Provincial de Lugo (MPL) o número 21 da serie “Monografías de Cuadernos de Estudios Gallegos” titulado Da vila do Castro d’Ouro ao concello de Alfoz: oitocentos anos na Historia.
Oitocentos anos despois da concesión do foro de Benavente aos poboadores de Castro de Aurio, o Concello de Alfoz, a Deputación de Lugo e o Instituto de Estudos Galegos Padre Sarmiento (IEGPS, CSIC – Xunta de Galicia) conmemoraron o octingentésimo aniversario da súa traxectoria histórica coa celebración dunhas xornadas de estudos históricos os días 2 e 3 de outubro de 2020 no centro sociocultural de Alfoz. Contou coas contribucións do doutor Abel Vigo García (Concello de Mondoñedo); a doutora Aurelia Balseiro García (Museo Provincial de Lugo, MPL); os doutores Carlos Baliñas Pérez, María Dolores Barral Rivadulla e Pegerto Saavedra Fernández (Universidade de Santiago de Compostela, USC); e, finalmente, dos doutores Carlos Andrés González Paz e Eduardo Pardo de Guevara y Valdés (Instituto de Estudos Galegos Padre Sarmiento, IEGPS, CSIC – Xunta de Galicia).
Tras varios meses de proceso editorial, sae á luz o libro Da vila do Castro d’Ouro ao concello de Alfoz: oitocentos anos na Historia, número 21 da serie ““Monografías de Cuadernos de Estudios Gallegos” de Editorial CSIC, publicado coa inestimable colaboración da Secretaría Xeral da Lingua da Xunta de Galicia. Consta dunha introdución dos editores Carlos Baliñas Pérez e Carlos Andrés González Paz, titulada “A vila do Castro d’Ouro no contexto do desenvolvemento histórico do fenómeno urbano na Mariña medieval (séculos XII-XIII)” e de cinco capítulos: Abel Vigo García, “O mundo castrexo e galaico-romano en Alfoz”; Aurelia Balseiro García, “O ouro e a ourivería na Galécia antiga: o torque do Valadouro”; Carlos Andrés González Paz, “Del `Castro de Aurio´ al Castro d’Ouro: los vaivenes históricos de un conglomerado urbano rural en la Galicia de la Edad Media”; María Dolores Barral Rivadulla, “El arte medieval en el Castro de Ouro” e Pegerto Saavedra Fernández, “O concello de Alfoz de Castro de Ouro entre 1500 e 1850”.
Finalmente, no acto de presentación están previstas as intervencións de Iria Castro Fernández, deputada provincial de Cultura, Patrimonio Histórico Artístico e Normalización Lingüística da Deputación de Lugo; Sonia Expósito Goás, delegada de Cultura do Concello de Alfoz; Aurelia Balseiro García, directora do Museo Provincial de Lugo (MPL); Pablo S. Otero Piñeyro Maseda, director do Instituto de Estudos Galegos Padre Sarmiento (IEGPS, CSIC – Xunta de Galicia); Eduardo Pardo de Guevara e Valdés, director honorario do Instituto de Estudos Galegos Padre Sarmiento (IEGPS, CSIC – Xunta de Galicia); e os responsables da obra, Carlos Baliñas Pérez, da Universidade de Santiago de Compostela (USC) e Carlos Andrés González Paz, do Instituto de Estudos Galegos Padre Sarmiento (IEGPS, CSIC – Xunta de Galicia).
A entrada é gratuíta ata completar aforo e disponse de máis información na páxina web: https://comunidadermpl.gal/
