Inscripción previa en https://forms.gle/HbKvBz5VBW8jJ7C67
O vindeiro venres, 24 de maio de 2024, terá lugar o sexto relatorio do “IV Ciclo de Webinarios Divulgativos del IEGPS (2024): vidas medievales entre Galicia y Portugal”, titulada “Trovadores e política nos finais do século XII e inícios do século seguinte”, que será impartido polo Dr. José Carlos Ribeiro Miranda.
José Carlos Ribeiro Miranda é doutor en literatura portuguesa desde 1993 e exerce na actualidade de Profesor Catedrático na Faculdade de Letras da Universidade do Porto. Ademais, foi fundador do Seminário Medieval de Literatura, Pensamento e Sociedade (SMELPS), grupo de investigación do Instituto de Filosofia (Universidade do Porto). Tamén é presidente da rama Ibérica da International Arthurian Society. Nos últimos anos foi co-Investigador Principal do proxecto MELE (Dá Memória Escrita à Leitura do Espaço), dedicado ao estudo e divulgación da vida e obra do Conde D. Pedro de Barcelos.
Durante a súa vida académica ha estudado en profundidade a materia artúrica, o universo trovadoresco galego-portugués e a historiografía medieval ibérica. De entre os seus traballos, destaca a súa tese doutoral, editada en dous tomos cos títulos: A Demanda do Santo Graal e o Ciclo Arturiano da Vulgata, de 1998; e Galaaz e a Ideologia da Linhagem, de 2004; na área da poesía trovadoresca, a monografía Aurs Mesclatz ab Argen, Sobre a Primeira Geração de Trovadores Galego-Portugueses (2004) e Os Trovadores e o Rapto de Elvira Anes da Maia. Tamén se especializou no estudo da historiografia medieval, destacando o seu recente volume Pedro de Barcelos: Pensar Portugal antes do Império (en colaboración con Maria do Rosário Ferreira e João Paulo Martins Ferreira).
Segundo avanzou o relator, no webminario abordarase como e por que entre fins do XII e inicios do XIII (c. 1169-1211), innumerables fidalgos galego-portugueses usaron as súas relacións sociofamiliares transfronteirizas como mecanismo de apoio nos seus exilios e migracións entre os distintos reinos do Occidente Peninsular. Ao seu xuízo, foi neste complexo e interesante contexto cando xurdiron as primeiras composicións ao redor da poesía trovadoresca galego-portuguesa, sendo, por iso, de vital importancia o estudo destas redes de contacto.
