(https://iegps.csic.es/wp-content/uploads/2023/02/SEG-Pildora_09_GAL.mp4)
O Instituto de Estudos Galegos Padre Sarmiento (IEGPS), centro mixto do Consello Superior de Investigacións Científicas (CSIC) e da Xunta de Galicia, únese á efeméride do centenario do Seminario de Estudos Galegos (SEG), institución científica e cultural creada en 1923 e ligada á Universidade de Santiago de Compostela cuxo obxectivo principal era estudar e divulgar o patrimonio cultural galego.
Neste contexto, continua a iniciativa promovida polo IEGPS, co apoio da Unidade de Cultura Científica (UCC) da Delegación do CSIC en Galicia: as “Pílulas CSIC do Seminario de Estudos Galegos”. Trátase dun total de 12 pezas audiovisuais cuxo labor é dar a coñecer o patrimonio do Seminario que se atopa custodiado no IEGPS.
A novena destas pezas, titulada “As doazóns do Seminario”, dá a coñecer cadros, debuxos e esculturas doados ao Seminario de Estudos Galegos por algúns dos seus membros por motivo do seu ingreso. É o caso, entre outros, de Tito Vázquez (1926) e o seu cadro “Ofelia muerta” ou o de María Corredoira ou Corredoyra (1928) e o seu lenzo “Cabeza”; tamén o debuxo a pluma “Ara Gael” de Camilo Diaz Valiño (1926) do que realizou varias versións; e o do escultor Francisco Asorey e a súa obra “Codeo Compostelano”.
No IEGPS consérvanse, ademais, porcelanas, ourivaría e mobiliario de época, ao que hai que engadir escritos científicos e textos literarios, todos de gran valor histórico e patrimonial que forman parte do gran legado do Seminario.
